Lent, First Week

(22^nd National Migrants' Day)

ANG PANUNUKSO NG DIYABLO KAY JESUS

Msgr. Ruben Dimaculangan

Itong pangyayari sa buhay ng Panginoon sa disyerto, ang kanyang pag-aayuno ng 40 araw na sinundan ng panunukso ng dyablo matapos na siya ay binyagan ni Juan Bautista, ay napili ngayong unang Linggo ng Kwaresma para palaksin ang ating kalooban at mahimok na magpakatibay.

Ang pagdanas ni Jesus ng tatlong uri ng tukso, na karaniwang siya ring mga tukso na dumaraan sa ating buhay, ay larawan ng kanyang pagdamay sa ating pagkatao:

a. Tukso ng layaw ng katawan, tawag ng laman at pagkamakasarili (ang gawing tinapay ang mga bato)

b. Tukso ng pagmamataas at karangalan (magpatihulog lang siya sa taluktok ng templo at ipakita na siya ay tunay na Anak ng Diyos dahil aalalayan siya ng mga anghel). - Ito rin ang klase ng tukso na kinabagsakan ni Moises nang padala siya sa mga reklamo ng mga Israelita laban kay Yahweh nang sila'y mauhaw sa disyerto matapos makatawid sa Dagat na Pula [Ex 17: 1-7]).

c. Tukso ng labis na kapangyarihan (magpatirapa lang siya at sumamba sa demonyo).

Pero kay Kristo mas makapangyarihan ang pagmamahal nya sa Ama kaysa padala sa tukso ng "easy money" at "absolute power". Kaagad nyang naitaboy ang demonyo bunga ng kanyang sigasig sa pananalangin. Maliksi nyang nasabing: "Back off!". Alam kasi ni Kristo na ang tukso ay laging mas kaakit-akit tingnan doon lang sa simula, i.e., bago mangyari ang kasalanan. Saka lang tayo nanghihilakbot sa kapangitan nito matapos na tayo'y mahulog na sa kasalanan. Kaya nga, tandaan ninyo ito, mga kapatid: "Mas madali ang lumayo sa tukso kaysa umahon sa patibong o balon ng pagkakasala."

Sinasabi nga rin ng isang Chinese proverb: "Hindi mo mapipigilang magpaikot-ikot sa iyong ulunan ang mga ibon, pero pwede mong maiwasan na sila'y mamugad, mangitlog at magkalat sa iyong tuktok." Pwede tayong umiwas na pamalagiin sila sa ating isip. Pero dahil hindi tayo kasing-lakas ni Kristo, wa-epek sa dyablo kahit sigawan natin ito ng sampung beses na "back off". Ang payo nga ng mga Santo ay tayo na mismo ang mag-back off sa mga tukso, at kung maaari ay kumaripas pa tayo ng takbo mula sa okasyon ng tukso dahil napaka-tuso ng dyablo. Ang kasalanan ay laging nababalot ng kagandahan at maraming itong kaibigan.

Para sa mga above 20 years old na, nakita ko na "Mas naiintindihan natin ang buong buhay natin kung ito ay niri-review at pinagninilayan… kasama lalo na ang mga pagkakataong tayo ay nadapa." Ang problema para sa ating lahat, para mag-move on, para ma-enjoy ang regalong buhay sa atin ng Diyos, hindi pwedeng paatras lagi ang tingin at magpakalunod sa ating nakalipas. Kinakailangang humakbang paabante.

Mga kapatid, bagama't sagana ang biyaya ng Diyos sa ating paglalakbay at lagi Siyang handang magpatawad, bayaan nyong ulitin ko habang tayo ay malakas pa: "Mas madali ang lumayo sa tukso kaysa umahon sa balon ng pagkakasala." Pwede tayong matulungan ng kasamaan na makamtan anuman ang ating pangarap (even our wildest dreams), pero hindi tayo mapapalaya ng kasamaan. Gagawin nito tayong kanyang alipin, takot sa liwanag, nahihiya sa ating kahubdan bunga ng kapangitan ng kasalanan.

Mga kapatid, ang Kwaresma ay panahon upang talikdan ang kasalanan, yakapin ang Ebanghelyo at bagtasin ang tamang daan.